மனித உரிமைகள் ஆணைக்குழுவின் பரிந்துரைகளைப் பொருட்படுத்தாமல் தமிழ் நூல்களைத் தொடர்ந்து தடுத்து வைத்திருக்கும் சுங்கம்

அமைச்சர் ஒருவர் தலையிட்டு, தடுத்து வைக்கப்பட்டுள்ள தனது 360 நூல்களையும் விடுவிப்பதற்கு நடவடிக்கை எடுப்பதாக உறுதியளித்து ஆறு மாதங்களுக்கும் மேலாகக் கடந்துள்ள போதிலும், அந்தப் புத்தகங்கள் இதுவரை விடுவிக்கப்படாமையால், சிங்கள வாசகர்களின் மதிப்பைப் பெற்ற தமிழ் எழுத்தாளர் ஒருவர் கடுமையான மன உளைச்சலுக்கு உள்ளாகியுள்ளார்.

பிரதீபன் தீபச்செல்வனின் தமிழ் நூல்களை இலங்கை கலை மன்றத்தின் அனுசரணையுடன் சுங்கத் திணைக்களம் தடுத்து வைத்திருந்ததன் மூலம், மொழியை அடிப்படையாகக் கொண்ட பாகுபாட்டை வெளிப்படுத்தி, தனது சொந்தக் கலாசாரத்தையும் மொழியையும் பயன்படுத்துவதற்கான எழுத்தாளரின் உரிமையை சுங்கத் திணைக்களம் மீறியுள்ளதாக அண்மையில் தீர்மானித்த இலங்கை மனித உரிமைகள் ஆணைக்குழு, அந்தப் புத்தகங்களை உடனடியாக விடுவிக்குமாறு பரிந்துரைத்திருந்தது.

மனித உரிமைகள் ஆணைக்குழு வழங்கிய தீர்மானத்தை உடனடியாக நடைமுறைப்படுத்துமாறு எழுத்தாளர்கள், கலைஞர்கள், சட்டத்தரணிகள் மற்றும் தொழிற்சங்கச் செயற்பாட்டாளர்கள் உள்ளிட்ட குழுவினர் கொழும்பில் நடைபெற்ற ஊடகவியலாளர் சந்திப்பில் கோரிக்கை விடுத்தனர்.

தமிழ் மொழி அறிவோ அல்லது ஒரு புத்தகம் தேசிய பாதுகாப்புக்கு அச்சுறுத்தலாக அமையக்கூடிய விதம் தொடர்பான நிபுணத்துவ அறிவோ இல்லாத நிலையில், தேசிய மக்கள் சக்தி அரசாங்கத்தின் கலை மன்றத்தில் பதவி வகிக்கும் உறுப்பினர்கள், தீபச்செல்வன் என்ற எழுத்தாளரின் மனித உரிமைகளை மீறி நூல்களைத் தடைசெய்வதில் பங்கெடுத்துத் தங்களது உண்மை முகத்தை வெளிப்படுத்தியமை குறித்து இலங்கை ஆசிரியர் சங்கத்தின் தலைவர் ஜோசப் ஸ்டாலினும் கவலை தெரிவித்துள்ளார்.

ஜீ. ஜீ. சரத் ஆனந்தவால் ஸ்மாரக சிலாவத (ස්මාරක ශිලාවත) என்ற பெயரில் சிங்களத்தில் மொழிபெயர்க்கப்பட்ட, போருக்குப் பின்னர் வடக்கில் எழுதப்பட்ட முதலாவது நாவலாகக் கருதப்படும் ‘நடுகல்’ நூலின் ஆசிரியர் என்ற வகையில், வாசகர்கள் மற்றும் விமர்சகர்களின் பெரும் கவனத்தைப் பெற்ற பிரதீபன் தீபச்செல்வன், தனது நூல்கள் நீண்ட காலமாக இவ்வாறு சுங்கத் திணைக்களத்தினால் தடுத்து வைக்கப்பட்டிருப்பதால் தான் கடுமையான மன அழுத்தத்திற்கு உள்ளாகியுள்ளதாகத் தெரிவிக்கிறார்.

“அவர்கள் அன்றே இந்தப் புத்தகங்களை விடுவித்திருந்தால், இந்தப் பிரச்சினை இவ்வளவு தூரம் சென்றிருக்காது. நம்பிக்கையளித்துவிட்டு இரண்டு புத்தகங்களை விடுவித்தார்கள்; மேலும் இரண்டு புத்தகங்களைத் தடுத்து வைத்தார்கள். உண்மையில், பல மாதங்கள் கடந்துவிட்டன. ஆறு மாதங்களுக்கும் மேலாகிவிட்டது. இது எனக்குப் பெரும் மன உளைச்சலை ஏற்படுத்தியுள்ளது. எனது எழுத்துப் பணிகளையும் இது பாதித்துள்ளது. பல்வேறு தடைகள், பல்வேறு குழப்பங்கள் என நான் கடுமையான மன அழுத்தத்திற்கு உள்ளான காலமாக இந்தக் காலப்பகுதி அமைந்துள்ளது.”

கலைஞராகப் பெயர்பெற்ற கலாநிதி ஹினிதும சுனில் செனெவி அமைச்சராக நியமிக்கப்பட்ட பின்னர், தனது கடந்தகாலப் பாத்திரத்தை மறந்து, இந்த அரச இயந்திரத்தின் ஓர் அங்கமாகச் செயற்படுபவர் என்பதை தற்போது நிரூபித்துவிட்டதாக எழுத்தாளர் தீபச்செல்வன் மேலும் தெரிவித்தார்.

“இந்த அரசாங்கம் கலைஞர்களை எந்தளவுக்கு அடக்குகிறது, எந்தளவுக்கு வேதனைப்படுத்துகிறது என்பதற்கு இது ஒரு பெரிய உதாரணம். கடந்த காலத்தில் நாம் எதிர்கொள்ளாத அனுபவங்களை இந்த அரசாங்கம் எமக்கு வழங்கியுள்ளது என்பதை மறக்க முடியாது. சுனில் செனெவி அவர்கள் கடந்த காலத்தில் ஒரு கலைஞராகவும், கலைஞர்களுடன் இணைந்து செயற்படுபவராகவும் இருந்தார் என எனது நண்பர்கள் சிலர் கூறியுள்ளனர். ஆனால், அதிகாரமும் அமைச்சுப் பதவிகளும் கிடைக்கும்போது, அவரும் இந்த அரச இயந்திரத்திற்குள் இருந்து செயற்படுபவராக மாறிவிட்டார் என்றே நான் கருதுகிறேன்.”

தமிழில் எழுதப்பட்டவை என்பதற்காகவே “இப்போதும் இங்கே இரண்டு தேசங்கள்தான்” மற்றும் “எழுத்தால் நான் யுத்தம் செய்கிறேன்” ஆகிய நூல்களைச் சுங்கத் திணைக்களம் தொடர்ந்து தடுத்து வைத்திருப்பதன் மூலம், இலங்கை அரசியலமைப்பின் 12(2) ஆவது உறுப்புரையில் உறுதிப்படுத்தப்பட்டுள்ள மொழியை அடிப்படையாகக் கொண்ட பாகுபாட்டுக்கு உட்படுத்தப்படாமல் இருப்பதற்கான தீபச்செல்வனின் உரிமை மீறப்பட்டுள்ளதாக இலங்கை மனித உரிமைகள் ஆணைக்குழு தெரிவித்துள்ளது.

தனது நூல்கள் தொடர்பாக இலங்கை மனித உரிமைகள் ஆணைக்குழு வழங்கிய பரிந்துரைகள், தமிழ் மொழியில் எழுதும் ஓர் எழுத்தாளருக்குத் தனது கலாசாரம் மற்றும் மொழி தொடர்பாக உள்ள உரிமையை வலியுறுத்திய தீர்மானம் என எழுத்தாளர் தீபச்செல்வன் தெரிவிக்கிறார்.

“இலங்கையில் தமிழ் எழுத்தாளர் ஒருவர், தமிழ் மொழியில் எழுதும் புத்தகம் ஒன்று சந்தேகத்திற்குரிய படைப்பாகவும் நம்ப முடியாத படைப்பாகவும் கருதப்படும் சூழல் உருவாகியுள்ளது. இத்தகைய பின்னணியில், தமிழ் மொழி குறித்த புரிதலின்மையும் அச்சமும், தமிழ் கலைஞர்கள் குறித்த புரிதலின்மையும் அச்சமும் போன்ற முக்கியமான விடயங்களை, அதாவது அரச நிறுவனங்களுக்கும் அரசாங்கத் தரப்புக்கும் உள்ள அச்சம் மற்றும் நம்பிக்கையின்மை ஆகியவற்றை மனித உரிமைகள் ஆணைக்குழுவின் பரிந்துரை வெளிப்படுத்தியுள்ளது. அதேபோன்று, பக்கச்சார்பான நடவடிக்கைகள், அடிப்படை மனித உரிமை மீறல்கள், தமிழ் மொழியில் எழுதும் ஓர் எழுத்தாளருக்குத் தனது கலாசாரம் மற்றும் மொழி தொடர்பாக உள்ள உரிமை போன்ற விடயங்களையும் இந்தத் தீர்மானம் வலியுறுத்தியுள்ளது.”

இலங்கையில் தமிழ் மக்களின் மனித உரிமை மீறல்கள் தொடர்பாகக் கோரப்படும் நீதியைப் பெற்றுக்கொள்வதில் பாரிய கேள்விகள் காணப்பட்டாலும், தனது விடயம் தொடர்பாக இலங்கை மனித உரிமைகள் ஆணைக்குழு வழங்கிய பரிந்துரைகள் மிகவும் முக்கியமானவை என பிரதீபன் தீபச்செல்வன் மேலும் தெரிவித்துள்ளார்.

சுங்கத் திணைக்களத்தினால் தடுத்து வைக்கப்பட்டுள்ள பிரதீபன் தீபச்செல்வனின் நூல்களை விடுவிப்பது தொடர்பில் முடிவெடுக்கும்போது, அரசாங்க அதிகாரிகள் பொறுப்பிலிருந்து தப்பிப்பதற்காக ஒருவரிடமிருந்து மற்றொருவருக்குப் பொறுப்பை மாற்றிய நாடகத்தனமான செயற்பாட்டை இலங்கை மனித உரிமைகள் ஆணைக்குழுவின் அறிக்கை வெளிப்படுத்தியுள்ளது.

“இலங்கை சுங்கத் திணைக்களம் அந்தப் பொறுப்பை பாதுகாப்பு அமைச்சிடம் ஒப்படைத்தது. புத்தகங்கள் தேசிய பாதுகாப்புக்கு பாதிப்பை ஏற்படுத்தக்கூடும் என்று ஏற்கனவே கூறியிருந்த பாதுகாப்பு அமைச்சு, அந்தப் பொறுப்பை புத்தசாசன, சமய மற்றும் கலாசார அலுவல்கள் அமைச்சிடம் ஒப்படைக்க விரும்பியது. சம்பந்தப்பட்ட விடயம் தனது அதிகார வரம்புக்குள் வருவதில்லை எனக் கூறிய கலை மன்றம், இறுதியில் அந்தப் பொறுப்பை வெளிப்புறத் தமிழ் மொழி நிபுணர்களிடம் ஒப்படைத்தது” என்று ஆணைக்குழு தெரிவித்துள்ளது.

ஒரு தமிழ் எழுத்தாளரின் நூல்கள் தொடர்பில்கூட இவ்வாறு செயற்படும் தற்போதைய அரசாங்கமும் அதிகாரிகளும், தமிழ் மக்களின் ஏனைய பிரச்சினைகளுக்கு நியாயமான தீர்வுகளை வழங்குவார்கள் எனத் தன்னால் ஒருபோதும் நம்ப முடியாது என்று பிரதீபன் தீபச்செல்வன் தெரிவிக்கிறார்.

“எமது பிரச்சினைகளை ஆரம்பத்திலிருந்து இவர்களுக்கு விளக்க வேண்டிய அவசியமே இல்லை. எம்மைவிடவும் எமது தலைவர்களைவிடவும் ஆழமாக எமது பிரச்சினைகள் குறித்து அவர்கள் பேசியவர்கள். ஆனால், இன்று கடந்த காலத்தில் ரணில், கோட்டாபய, மஹிந்த ராஜபக்ச ஆகியோரின் ஆட்சிகளில் தமிழ் மக்களின் பிரச்சினைகளுக்குத் தீர்வு காணாமல், அவற்றைக் கண்டுகொள்ளாததுபோல் எந்த முயற்சியும் எடுக்காமல் இருந்த அதே நடைமுறைகளை இந்த அரசாங்கமும் பின்பற்றுகிறது. ஆட்சியைக் கைப்பற்றி இரண்டு ஆண்டுகளுக்கும் மேலாகிவிட்டது. தமிழ் மக்களின் அரசியல் சுயநிர்ணய உரிமை, கைதிகளை விடுதலை செய்தல், இனப்படுகொலை மற்றும் போர்க்குற்றங்கள் தொடர்பான பிரச்சினைகளுக்குத் தீர்வு அல்லது நீதி வழங்குதல் என எந்தவொரு விடயத்திலும் ஓர் அடிகூட முன்னேறாமல் இருக்கிறார்கள். கடந்த அரசாங்கத்திற்கும் இந்த அரசாங்கத்திற்கும் இடையில் இதில் எந்த வேறுபாடும் இல்லை.”

தமிழ் மக்களின் கணிசமான பங்களிப்புடன் ஆட்சிக்கு வந்த தற்போதைய தேசிய மக்கள் சக்தி அரசாங்கம், தமிழ் மக்களுக்கு நீதியை வழங்குவதற்குப் பதிலாக, அவர்களுக்கு எதிரான அடக்குமுறையைத் தொடர்ந்து முன்னெடுத்து வருவதாகப் பிரதீபன் தீபச்செல்வன் மேலும் தெரிவிக்கிறார்.

“அதற்குப் பதிலாக, கலைஞர்களை அடக்குவது, நினைவேந்தல்களை மிகவும் நுட்பமான முறையில் கட்டுப்படுத்துவது போன்ற தமிழ் மக்களுக்கு எதிரான அடக்குமுறைகளை இந்த அரசாங்கம் தொடர்ந்து முன்னெடுத்து வருகிறது. உண்மையில், இலங்கையின் தமிழ் மக்கள் இந்த ஆட்சிக்கு கணிசமான அளவில் ஆதரவளித்தனர். வரலாற்றில் முதல் முறையாக தெற்கின் ஓர் அரசியல் கட்சியான தேசிய மக்கள் சக்தி, மாற்றத்திற்காக வடக்கு, கிழக்கு மாகாணங்களிலும் யாழ்ப்பாணத்திலும் அதிகளவிலான ஆசனங்களைப் பெற்றது. அவ்வாறு இருந்தபோதிலும், தமிழ் மக்களின் உரிமைகளைப் பகிர்ந்தளிப்பதற்கான நடவடிக்கைகளை இந்த ஆட்சி அல்லது அரசாங்கம் எடுக்கவில்லை என்பதை எமது வரலாறும் நிகழ்காலமும் உணர்த்துகின்றன என நான் நம்புகிறேன்.”

தீபச்செல்வன் என்ற எழுத்தாளரின் மனித உரிமைகளை மீறி நூல்களைத் தடைசெய்வதில் பங்கெடுத்தமைக்காக, தேசிய மக்கள் சக்தி அரசாங்கத்தின் கலை மன்றத்தில் பதவி வகிக்கும் உறுப்பினர்களைச் சிங்கள எழுத்தாளர்கள் மற்றும் தொழிற்சங்கத் தலைவர்கள் உள்ளிட்ட தெற்கைச் சேர்ந்த குழுவினர் கடுமையாக விமர்சித்தனர்.

“தற்போது இந்த நாட்டின் தேசிய மக்கள் சக்தி அரசாங்கத்தின் இலக்கிய உபகுழுவில் யார் இருக்கிறார்கள்? கலாநிதி சுனில் விஜேசிறிவர்தன, ஜயதிலக கம்மெல்லவீர போன்ற எழுத்தாளர்கள் இந்த நாட்டில் இலக்கியச் சுதந்திரத்திற்காகக் குரல் கொடுத்தவர்கள். இந்த நாட்டில் நல்லிணக்கத்திற்காகப் பேசியவர்கள். இவர்கள் தேசிய மக்கள் சக்தி அரசாங்கத்திற்குள் சென்று, அரசாங்கத்தில் முக்கிய இடத்தைப் பெற்ற பின்னர், இந்த நூல்களைத் தடைசெய்யும் நிலைக்குச் சென்றது ஏன்? இது மிகவும் கவலைக்குரிய நிலைமை. இந்த இலக்கியவாதிகள் மற்றும் சிவில் சமூக புத்திஜீவிகள் குறித்து இந்த நாட்டில் ஒரு மதிப்பு இருந்தது. அந்த மதிப்பைப் பெற்றிருந்த அவர்கள் செய்தது என்ன? அவர்கள் ஒரு விசேட பங்களிப்பை ஆற்றியவர்கள். இப்போது இந்தப் புத்தகங்களைத் தடைசெய்வதற்கு அவர்கள் ஆதரவாகச் செயற்பட்டதை நாம் பார்த்தோம். அவ்வாறு ஆதரவளித்த பின்னர், தற்போது மனித உரிமைகள் ஆணைக்குழு இத்தகைய தீர்மானத்தை வழங்கியுள்ள நிலையில் அவர்கள் என்ன கூறுகிறார்கள்? ஓர் அரசாங்கத்தைப் பாதுகாப்பதற்காக எழுத்தாளர் ஒருவரின் கலைப்படைப்புகளுக்குத் தடைகளை ஏற்படுத்த இத்தகையவர்கள் முன்வருவது குறித்து நாம் மிகவும் கவலையடைகிறோம்” என்று இலங்கை ஆசிரியர் சங்கத்தின் தலைவர் ஜோசப் ஸ்டாலின் கொழும்பில் நடைபெற்ற ஊடகவியலாளர் சந்திப்பில் தெரிவித்தார்.

இத்தகைய அரசாங்கங்களுக்குள் ‘கூலிக்கு வேலை செய்வதற்காக’ நுழைந்து, தமது தனிப்பட்ட முன்னேற்றத்திற்காகவும் இருப்பைத் தக்கவைத்துக்கொள்வதற்காகவும் செயற்பட வேண்டாம் என, இலக்கியவாதிகள் மற்றும் சிவில் சமூக புத்திஜீவிகள் என்ற அங்கீகாரத்தைப் பெற்றுள்ள அனைவரிடமும் ஆசிரியர் சங்கத் தலைவர் மேலும் கோரிக்கை விடுத்தார்.

“கடந்த அரசாங்கங்களிலும் இவ்வாறு கூலிக்கு வேலை செய்யும் கலைஞர்கள் பலர் இருந்ததை நாம் பார்த்தோம். ஆனால், தேசிய மக்கள் சக்தி அரசாங்கம் ஆட்சிக்கு வந்த பின்னர் இலக்கிய உபகுழுவிற்கு நியமிக்கப்பட்டவர்கள் சமூகத்தில் அங்கீகாரம் பெற்ற கலைஞர்கள் என்ற கருத்து நிலவியது. அவர்கள் கலைச் சுதந்திரம் தொடர்பாகச் சமூகத்தின் கருத்துகளை வெளிப்படுத்தியவர்கள். அதே நபர்கள் இந்த அரசாங்கத்திற்குள் சென்று, இவ்வாறு தங்களது உண்மை முகத்தை வெளிப்படுத்துவது மிகவும் கவலைக்குரியது. இது உண்மையிலேயே பாரதூரமான நிலைமை. இந்த நாட்டின் கலைஞர்கள் இத்தகைய அரசாங்கங்களுக்குள் சென்று தங்களது தனிப்பட்ட நலன்களுக்காகவும் இருப்பைத் தக்கவைத்துக்கொள்வதற்காகவும் செயற்பட வேண்டாம் என்று நாம் தெளிவாகக் கூற விரும்புகிறோம்.”

சுங்கத் திணைக்களத்தினால் தடுத்து வைக்கப்பட்டுள்ள பிரதீபன் தீபச்செல்வனின் நூல்களை, இலங்கை மனித உரிமைகள் ஆணைக்குழுவின் பரிந்துரைகளுக்கு மதிப்பளித்து உடனடியாக விடுவிக்குமாறு தெற்கைச் சேர்ந்த சிங்கள சிவில் சமூகச் செயற்பாட்டாளர்கள் குழுவினரும் அதிகாரிகளிடம் வலியுறுத்தியுள்ளனர்.