15 பாடசாலைகளில் வன்முறை: 200,000 யூரோக்கள் இழப்பு – Valérie Pécresse தகவல்!!

Île-de-France பிராந்தியத்தில் கடந்த சில நாட்களாக இடம்பெற்று வரும் உயர்நிலைப் பாடசாலை மாணவர்களின் போராட்டங்கள் மற்றும் முற்றுகைப் போராட்டங்களின்போது குறைந்தது 15 பாடசாலைகள் சூறையாடப்பட்டுள்ளதாக பிராந்தியத் தலைவர் Valérie Pécresse தெரிவித்துள்ளார். சேதமடைந்த கட்டடங்கள் மற்றும் சொத்துக்களைச் சீரமைப்பதற்கான செலவு ஏற்கனவே 200,000 யூரோக்களாக மதிப்பிடப்பட்டுள்ளதாகவும் அவர் குறிப்பிட்டுள்ளார். செப்டம்பர் மாதம் 28ஆம் திகதி திங்கட்கிழமை பாடசாலைகளுக்கு அருகில் இடம்பெற்ற போராட்டங்களுடன் தொடர்புடைய சம்பவங்களில் 164 பேர் காவல்துறையினரால் கைது செய்யப்பட்டதாக அதிகாரிகள் தெரிவித்துள்ளனர்.

இந்தச் சம்பவங்கள் காரணமாக கல்வி நடவடிக்கைகளும் பாதிக்கப்படக்கூடும் எனக் கவலை வெளியிட்ட Valérie Pécresse, சேதங்களைச் சீரமைப்பதற்காக 200,000 யூரோக்கள் செலவிடப்படும்போது எத்தனை கல்விசார் நடவடிக்கைகளை இரத்துச் செய்ய வேண்டியிருக்கும் எனக் கேள்வி எழுப்பியுள்ளார். மேலும், Saint-Denis நகரிலுள்ள Paul Éluard பாடசாலையில் மாணவி ஒருவர் ஹைட்ரோகுளோரிக் அமிலத்தால் முகத்தில் காயமடைந்ததாகவும், இந்தத் தாக்குதலுக்கு ஆசிரியர்களோ காவல்துறையினரோ காரணமல்ல, வன்முறையில் ஈடுபட்டவர்களே காரணம் என்றும் தெரிவித்துள்ளார். கடந்த வாரம் பட்டாசு வெடிகுண்டு தாக்குதலின் சிதறல் பட்டு பாடசாலை அதிபர் ஒருவரும் காயமடைந்ததாகவும், ஆசிரியர்கள் மற்றும் கல்விப் பணியாளர்கள் மிகுந்த மன அழுத்தத்தில் இருப்பதாகவும் அவர் குறிப்பிட்டுள்ளார்.

இதற்கிடையில், மாணவர் போராட்டங்களை அரசியல் நோக்கங்களுக்காகப் பயன்படுத்துவதாகவும், La France Insoumise (LFI) கட்சி சமூக வலைத்தளங்கள் ஊடாகப் போராட்டத்துக்கு அழைப்பு விடுத்துள்ளதாகவும் Valérie Pécresse குற்றஞ்சாட்டியுள்ளார். கடந்த ஒரு வாரமாகப் பாடசாலைகளில் அதிகரித்த வகுப்புச் சுமை, நெருக்கடியான கால அட்டவணை மற்றும் ஆசிரியர் பற்றாக்குறை உள்ளிட்ட பிரச்சினைகளை முன்வைத்து மாணவர்கள் போராட்டத்தில் ஈடுபட்டு வருகின்றனர்.

திங்கட்கிழமை இந்தப் போராட்டம் ஏனைய பிராந்தியங்களுக்கும் பரவிய நிலையில், செவ்வாய்க்கிழமை இடம்பெறும் பொதுத்துறை வேலைநிறுத்தத்தின்போதும் பாடசாலை முற்றுகைகள் மற்றும் தீயணைப்புப் படையினரின் பேரணி ஆகியவை அதிகாரிகளின் கவனத்தை ஈர்த்துள்ளன. பரிஸ் நகரிலுள்ள 90 உயர்நிலைப் பாடசாலைகளில் செவ்வாய்க்கிழமை காலை 8 மணியளவில் பத்துக்கும் குறைவான பாடசாலைகளில் முற்றுகை முயற்சிகள் இடம்பெற்றதாகக் கல்வி நிர்வாகம் தெரிவித்துள்ளது.